Юлія Лазікевіч з намеснікам старшыні аблвыканкама Уладзімірам Пеніным
Напярэдадні Дня маці ў Віцебскім аблвыканкаме адбыўся ўрачысты прыём, на якім 12 прадстаўніц вобласці былі ўзнагароджаны ордэнам Маці, 25 — прэміямі імя Героя Савецкага Саюза Зінаіды Тусналобавай-Марчанка. Сярод лаўрэатаў і галоўны рэдактар тэлеканала «Паставы-ТБ» Юлія Лазікевіч.
— Словамі не перадаць тое, што адчувала на прыёме падчас атрымання з рук намесніка старшыні аблвыканкама Уладзіміра Пеніна прэміі, — расказвала Юлія. — Мець не адно дзіця — мая мара з маленства. Яна ажыццявілася: іх у мяне трое — дзве дачушкі і сынок. Гэта нястомная штодзённая праца і вялікае шчасце з засмучэннямі і радасцямі, няўдачамі і поспехамі. Найвышэйшая ўзнагарода за мацярынскую любоў — пяшчотныя абдымкі і пацалункі дзетак. Бязмежна рада, што жыву ў Беларусі, дзе сем’ям і дзецям удзяляецца пастаянная ўвага з боку Прэзідэнта, урада, органаў мясцовай улады.
У краіне склалася стабільная сістэма мер сацыяльна-эканамічнай падтрымкі мнагадзетных сем’яў: прадугледжаны розныя віды дапамог, ільгот, гарантый. Зроблены акцэнт на ўмацаванне сямейных каштоўнасцей, фарміраванне здаровага ладу жыцця. Прэмія імя Зінаіды Тусналобавай-Марчанка зацверджана аблвыканкамам з мэтай павышэння прэстыжу мацярынства, умацавання інстытута сям’і, сямейных традыцый, прапаганды вопыту ў выхаванні дзяцей. Ёй узнагароджваюцца толькі жанчыны Віцебшчыны.
Віншуем Юлію!
Анна АНІШКЕВІЧ, газета «Пастаўскі край»
Фота Сяргея ПЛЕШАКОВА