Свята галоўнай ёлкі

На свята лясной прыгажуні на плошчы імя Леніна ў райцэнтры работнікі Цэнтра культуры і народнай творчасці раёна запрашаюць 30 снежня. На тэатралізаванае прадстаўленне прыбудуць галоўныя казачныя персанажы Дзед Мароз і Снягурка. Разам з імі і іншымі героямі дзеці і дарослыя змогуць весела правесці час у карагодах і гульнях. Чакае шмат сюрпрызаў. Свае арыгінальныя вырабы прапануюць майстры Дома рамёстваў "Стары млын". Той, хто замерзне, зможа сагрэцца духмянай гарбатай і, вядома, танцамі, жартамі, песнямі. Пачатак свята ў 11 гадзін.

На тым жа месцы ў той жа час

Гэта таксама пра ёлку на цэнтральнай плошчы і гарадское свята "Сустракаем разам Новы, 2019-ы, год!". Па традыцыі арганізатары мерапрыемства запрашаюць гараджан і гасцей сустрэцца ў навагоднюю ноч ля галоўнага сімвала Новага года, павіншаваць адно аднаго і павесяліцца ў коле сяброў, а можа, і завесці новыя знаёмствы. Праграма будзе цікавай. Неба ўпрыгожыць феерверк. Час сустрэчы — 1.30.

Ахвотных патанцаваць не на свежым паветры, а ў цяпле чакаюць у раённым Доме культуры па вуліцы Станкевіча. Танцавальна-забаўляльная праграма пачнецца там у 2.00.

Фота І.Цапэліка